Ҳаял-қызларды қоллап-қуўатлау тараўындағы жаңалықлар
Өзбекстан Республикасының «Шаңарақ ҳәм ҳаял-қызларды қоллап-қуўатлаў тараўын жетилистириў мүнәсибети менен Өзбекстан Республикасының айрым нызам ҳүжжетлерине қосымша ҳәм өзгерислер киритиў ҳаққында»ғы 2025-жыл 9-апрель күнги нызамы менен Өзбекстан Республикасының Шаңарақ кодексине қосымшалар киритилип, оған көре некеден ажырасыў ҳаққындағы ислер көрилип атырғанында суд шаңарақлық (социаллық) зорлықтан жәбирленген шахстың талабына көре жарасыў ушын мүддет тайынламаслығы белгиленген.
Шахс, қандай жағдайда шаңарақлық (социаллық) зорлықта жәбирленген деп есапланады.
Өзбекстан Республикасы Ҳәкимшилик жуўапкершилик ҳаққындағы Кодексиниң
592–статьясына көре, шаңарақлық (социаллық) зорлық, яғный усы статьяның биринши бөлимине көре, ҳаялына (күйеўине), алдынғы ҳаялына (алдынғы күйеўине), бир шаңарақ тийкарында биргеликте жасап атырған шахсқа ямаса улыўмалық перзентке ийе болған шахсқа қарата сәдир етилген мүлк, тәлим алыў, ден-саўлықты сақлаў ҳәм (ямаса) мийнетке байланыслы ҳуқықты әмелге асырыўға тосқынлық етиў, мал-мүлкине ҳәм жеке буйымларына қасттан зиян жеткизиў, тап сондай усы шахслар ден-саўлығының жаманласыўына алып келген тәризде олардың ар-намысын кемситиў, оларды қорқытыў, жақын қарындасларынан ажыратып қойыў, жынаят белгилери, сондай-ақ, усы Кодексте нәзерде тутылған басқа ҳуқықбузарлық белгилери болмаса, базалық есаплаў муғдарының он есесинен жигирма есесине шекем жәрийма салыўға ямаса он суткаға шекемги мүддетке ҳәкимшилик қамаққа алыўға себеп болады.
Усы статьяның екинши бөлимине тийкар болса, ҳаялының (күйеўиниң), алдынғы ҳаялының (алдынғы күйеўиниң), бир шаңарақ тийкарында бирге жасап атырған шахсты ямаса баланы, сондай-ақ, улыўмалық перзентке ийе болған шахсты урыў, усы шахсларға ден-саўлығының қысқа мүддетке жаманласыўына ямаса мийнет қәбилетиниң онша узақ болмаған мүддетке жоғалыўына алып келмеген қасттан денеге жеңил жарақат жеткериў, базалық есаплаў муғдарының он есесинен жигирма есесине шекемги муғдарында жәрийма салыўға ямаса он бес суткаға шекемги мүддетке ҳәкимшилик қамаққа алыўға себеп болады.
Усы Нызам шаңарақлық (социаллық) зорлықтан жәбирленген шахслардың ҳуқуқлары ҳәм нызамлы мәплерин қорғаўды жәнеде күшейтиўге хызмет етеди.
Қарақалпақстан Республикасы ҳәкимшилик судының судьясы Ж.Аймаганбетова